Sot, në Ranilug u mbajt një sesion informues rreth fazës së parë të skemës së granteve për zhvillimin e bujqësisë dhe ndërmarrjes rurale në Kosovë. Ministri për Komunitete dhe Kthim theksoi se ky program është një hap i rëndësishëm në fuqizimin e komuniteteve jo-shumicë dhe premtoi mbështetjen e plotë të Ministrisë për të gjithë përfituesit. "Qëllimi ynë është t'u japim njerëzve në fshat një shans për të filluar ose përmirësuar bizneset e tyre dhe të qëndrojnë në vatrat e tyre", tha ministri.

Faza e parë e skemës së granteve do të jetë e hapur nga 16 shtatori deri më 1 nëntor 2025. Kjo skemë, e zbatuar në partneritet me Ministrinë e Komuniteteve dhe Kthimit dhe GIZ, me bashkëfinancim nga BMZ, ofron grante për pajisje me vlerë nga 1,000 deri në 10,000 euro. Individët, ndërmarrjet e vogla dhe të mesme, start-up dhe fermerët nga komunitetet jo-shumicë janë të kualifikuar për të aplikuar, ndërsa projektet duhet të jenë të orientuara drejt fitimit dhe të zbatohen në zonat rurale.

Aplikimet dorëzohen përmes platformës online "Good Grants". Më shumë informata rreth kësaj mund të gjenden në faqen zyrtare të Ministrisë dhe Shoqatës Humanitare "Nënë Tereza", si dhe në sesionet informuese në vijim.

Ky program përfaqëson një kontribut të rëndësishëm në zhvillimin e bujqësisë dhe sipërmarrjes rurale midis komuniteteve jo-shumicë në Kosovë.