03 nëntor 2023
Ministri për Komunitete dhe Kthim, Nenad Rashiq, para përfaqësuesve të vendeve të Quintit prezantoi një dokument të rëndësishëm, "Strategjia për Mbrojtjen e të Drejtave dhe Interesave të Komuniteteve dhe Anëtarëve të tyre", me synimin e sigurimit të kthimit të qëndrueshëm, zhvillimit ekonomik afatgjatë dhe përfaqësimit proporcional të komuniteteve në administratën publike të Kosovës.
Në këtë takim, Ministri Rashiq dhe përfaqësuesit e vendeve të Quintit diskutuan hollësisht për temat e kthimit, riintegrimit, si dhe përkujdesjen ndaj personave të zhvendosur dhe të kthyerve vullnetarë që nuk i përkasin shumicës, duke synuar ofrimin e mundësive për vendbanime të qëndrueshme. Ministri Rashiq theksoi se Strategjia përfshin sfida të rëndësishme si stabilizimi dhe përmirësimi i mirëqenies së komuniteteve përmes ofrimit të mundësive të barabarta në punësim, shërbime sociale, arsim dhe kulturë. Po ashtu, një prej qëllimeve të strategjisë është edhe përfaqësimi proporcional i komuniteteve pakicë në administratën publike si dhe zhvillimi i mekanizmave për përdorimin e gjuhëve.
Strategjia është ndërtuar mbi tre parime kryesore të harmonizuara me standardet ndërkombëtare dhe evropiane për pakicat kombëtare: parimi i të drejtave dhe mundësive të barabarta për të gjitha komunitetet, parimi i mos diskriminimit duke u përpjekur që shkalla e diskriminimit të zvogëlohet në të gjitha aspektet e jetës shoqërore, si dhe parimi i promovimit të drejtave të komuniteteve pakicë për të ruajtur identitetin e tyre kulturor dhe trashëgiminë.
Ministri Rashiq shpalosi se "Strategjia për Mbrojtjen dhe Promovimin e të Drejtave të Komuniteteve dhe Anëtarëve të tyre" për periudhën 2023-2027 paraqet një vazhdimësi të politikave të qeverisë së Kosovës për forcimin e karakterit multietnik dhe multikulturor të shoqërisë së saj. Ky dokument është pjesë e nismave për të siguruar të drejtat dhe përfaqësimin e barabartë të të gjitha komuniteteve në Kosovë për një shoqëri më të drejtë dhe të harmonishme. Ministri Rashiq u shpreh se kjo strategji është një hap i rëndësishëm për të promovuar integrimin dhe përmirësimin e kushteve jetësore për të gjitha komunitetet në Kosovë.
